گلمدین سانکی نگاریم سوزلریم گیرمانا دوندو
قارقالار فیرتانا سالدی ، تولکولر جیرانا دوندو
چوخ شماتتلر ائشیددیم ، چوخ اشارتلره یاندیم
آیریلیق دردینی اوددوم، اوره ییم لاپ قانا دوندو
سنی آواره ائدن من ، منی تک قویما سن آنجاق
دوشمنین لشگری آرتیب، گوجلو بیر طوفانا دوندو
سوزی ظاهرده ، شریعت، عملی ترک طریقت
نه کی شیطاندان آلا درس، اوزو بیر شیطانا دوندی
بیلیرم حقدی وجودون، بیلیرم کی گله جاقسان
صبریمی کسدی اوزاقلیق ، گوزیاشیم عومانا دوندی
طعنه لر قلبیمی دلدی هارداسان آخیر اومیدیم
هارداسان گل کی گوروم من قورولوق بستانا دوندو
سوزومه دویغو باغیشلا، شعریمین تاثیرین آرتیر
انجومن عرصه سی آخیر ، قانلی بیر میدانا دوندو
سنین عشقینله دایاندیم، گورمه سینلر دیزه کوچدوم
گله سن کاش گوره لر کی ییخیلان ، اصلانا دوندو
درباره این سایت